ಕಂಪ ಸೂಸೋ ಹೊಳಪಿನವಳ
ಜಡೆಯು ನನ್ನ ಕುಕ್ಕಿದೆ
ಹಣೆಯ ಬೊಟ್ಟು ಭವ್ಯವಂತೆ
ಪೂರ್ಣ ಶಿಲೆಯ ಹಾಗಿಹೆ..
ಮುಡಿಯ ಹೂವು ಗಮಲು ಬಿಡುತ
ನನ್ನನಿಂದು ಸೆಳೆದಿದೆ
ಉಬ್ಬ ತುದಿಯ ವಾರೆ ನೋಟ
ಹೃದಯಕಿಂದು ಮುಟ್ಟಿದೆ
ಕಣ್ಣ ಕಪ್ಪು ಅಚ್ಚು ಮೆಚ್ಚು
ಕೊಂಚ ಮನವ ತಣಿಸಿದೆ
ತುಟಿಯ ಮೆಲ್ಲು ನಗೆಯು ನನ್ನ
ಬಾರಿ ಬಾರಿ ಮೀಟಿದೆ
ಹಲ್ಲು ಮುತ್ತು ರತ್ನದವಳ
ಏನೋ ಹೇಳಲಾಗಿದೆ
ನುಡಿವ ದನಿಗೆ ನನ್ನ ಮೌನ
ಕಟ್ಟು ಬಿಚ್ಚಿ ನಡೆಸಿದೆ
ಕತ್ತು ನವಿಲು, ಗಿಳಿಯ ಮೂಗು
ಗಾಳಿ ಮತ್ತನೆರಚಿದೆ
ಕೈಯ ಬಳೆಯ ಗಲುವ ನಾದ
ಹುಡುಕಿ ಅಲೆಯೋ ಹಾಗಿದೆ
ಎದೆಯ ಭಾರ ನನ್ನ ಪ್ರೀತಿ
ಹಾಗೆ ತೂಕ ಮಾಡಿದೆ
ಉದರ ಮುದ್ದೆ, ತುಪ್ಪದಂತೆ
ಅಪ್ಪಿ ಹಿತವ ಲೇಪಿದೆ.
ಟೊಂಕ ಶಿಲೆಯ ಕೆತ್ತಿದಾತ
ಮನಸು ಲೂಟಿ ಹೋಗಿದೆ
ನಡೆವ ಭಂಗಿ, ನಡುವ ರೀತಿ
ನಯನ ಹಿಡಿತ ಮೀರಿದೆ
ಮಡಿಲ ತೊಗಲು ಸ್ವರ್ಗದಂತೆ
ಕಿಚ್ಚು ಹತ್ತಿ ಉರಿದಿದೆ
ಹೆಜ್ಜೆ ಗುರುತು, ಗೆಜ್ಜೆ ಸಪಳ
ಎದೆಯ ಮೇಲೆ ಮೂಡಿದೆ
ಯಾರೇ ನೀನು ಚೆಲುವೆ ನನ್ನ
ಶಾಂತಿ ಭಂಗ ಮಾಡಿದೆ
ಎಲ್ಲಿ ನೀನೋ ಅಲ್ಲೇ ನಾನು
ಅಂತ ಮನವು ಹೇಳಿದೆ
No comments:
Post a Comment